Duke u bazuar në gjendjen e rënduar të Ambientit në Komunën e Deçanit sidomos problematikave që kanë të bëjnë me mbeturinat dhe Menaxhimin e tyre , Drejtoria për Shërbime Publike, Mbrojtje dhe Shpëtim me Vendim të Kryetarit të Komunës z. Rasim Selmanaj ka formuar grupin punues për hartimin dhe implementimin e projektit për grumbullimin e mbeturinave në territorin e Komunës së Deçanit.
Si pasojë e hedhjes së mbeturinave kudo janë krijuar deponi të shumta ilegale ku sipas një hulumtimit të bërë vitin e kaluar në territorin e Komunës së Deçanit janë evidentuar 78 hapësira me mbeturina me sipërfaqe prej 326439m2 sasia e të cilave është ekuivalent 222813m3. Në këto hapësira gjenden lloje të ndryshme të mbeturinave si ato inerte të amvisërisë , mbetje të kafshëve dhe të kombinuara. Me gjithë përpjekjet dhe masat që ka marrë Drejtoria gjegjëse në zbutjen e kësaj gjendjeje përsëri ndotja e ambientit nga mbeturinat mbetet në shkallë të lartë. Hudhja e mbeturinave kudo paraqet rrezik në aspekte të ndryshme në radhë të parë për shëndetin publik të qytetarëve. Me qellim të parandalimit të një katastrofe ekologjike grupi punues për Menaxhimin e mbeturinave në territorin e Komunës së Deçanit me 16.02.2011 ka mbajtur takim pune me ç’rast është hartuar plani i veprimit për menaxhimin e mbeturinave i cili në vete ngërthen format e grumbullimit të mbeturinave dhe mekanizmat për implementim.
