Deçani ka hapur dyrët për investime të mëdha nga kompanitë me renome botërore, ndërkohë kryetari i Komunës, Rasim Selmanaj, ka mirëpritur ofertën e kompanisë “Belenergy” nga Belgjika,
për ndërtimin e fluturakeve që prodhojnë energji nga era. “Do të jemi të hapur për të gjitha investimet që pretendojnë zhvillimin ekonomik dhe punësim në këtë komunë”, i ka thënë ai përfaqësuesit të kësaj kompanie, Hajdin Bela, i cili në këtë takim ka shpalosur ofertën për investime të mëdha në projekte për prodhimin e energjisë alternative. Për më tepër kryetari Selmanaj, ka premtuar përkrahjen institucionale dhe gjithçka që është në kuadër të ligjeve për investimet që do t’i bëjë kjo kompani nga Belgjika. Ndërkohë, ai ka përmendur mundësitë e investimeve të mëdha edhe në fushën e turizmit, hidroenergjetikes dhe të bujqësisë.
Pasi ka përmendur përvojën e kompanisë “Belenergy” në realizimin e projekteve për prodhimin e energjisë alternative, përkatësisht të fluturakeve që prodhojnë energji nga era, Hajdin Bela, ka thënë se Deçani për shkak të konfiguracionit të tij, është shumë atraktiv për realizimin e projekteve të energjisë alternative. Sipas tij, ekzistojnë të gjitha garancitë bankare e kompanisë në fjalë për investime deri në 300 milionë euro. Mirëpo, për investime të tilla kërkohet përkrahje e komunave përkatëse dhe garancitë shtetërore. “Hapi i parë i këtyre investimeve do të në komunën tuaj, përkatësisht në Dukagjin”, ka premtuar Bela, i cili ka thënë se paraprakisht duhet bërë studimet e fizibilitetit, të cilat sipas ekspertëve do të jenë pozitive. Ai ka treguar se për fillim do të ndërtojmë 150 fluturake në Dukagjin, ndërkohë që ndërtimi i tyre do të ndodhë edhe nëpër disa komuna të tjera të Kosovës.
Oferta e kësaj kompanie me renome, e cila sipas përfaqësuesit të saj do të zgjerohet edhe në Shqipëri, Mal të Zi dhe Bosne e Hercegovinë u tha se do të artikulohet edhe me ministrinë përkatëse dhe KEK-un, ndërkohë pas ndërtimit të fluturakeve, pritet të ndërtohet edhe një fabrikë për prodhimin e tyre. Realizimi i këtyre projekteve, pos sigurimit të energjisë alternative, e cila është e domosdoshme për vendin për t’i realizuar parametrat e BE-së, do të gjenerojë edhe vende të reja pune, ku pos fabrikës për prodhimin e stabilimenteve për fluturake vetëm në mirëmbajtje dhe punë të tjera mund të punësohen afro 200 punëtor. Nasim Haradinaj, drejtor i Drejtorisë Komunale të Bujqësisë, ka thënë se ekziston gatishmëri e pronarëve të tokave, por edhe e vet Komunës për të lejuar ndërtimin e fluturakeve në komplekset tokësore ku do të ndërtohen ato.
