Komuna themelon çmimin “Haki Povataj” i cili për çdo vit do tu ndahet njerëzve meritor në fushën e arsimit.
Haki Povataj, para 18 vitesh ishte vrarë me torturë nga sigurimi shtetëror serb në Stacionin Policor në Deçan, gjithnjë duke e mbrojtur dinjitetin e arsimit shqip dhe ligjet e Republikës së Kosovës, ndaj me të drejtë ai mbeti heroi i shkollës shqipe dhe dëshmor i kombit. Kështu, u tha në Akademinë Përkujtimore, e mbajtur të premten në Deçan, në të cilën merrnin pjesë udhëheqja komunale ,familjarë të dëshmorëve veteran dhe punëtor të arsimit. Ndërkohë, kryetari i Komunës Rasim Selmanaj, në nderim të veprës së tij madhore ka bërë publik themelimin e çmimit “Haki Povataj”, i cili për çdo vit do tu ndahet njerëzve meritor në fushën e arsimit.
Për guximin që kishte treguar në Lëvizjen e viteve të 90-ta dhe për sukseset që kishte treguar në udhëheqjen e shkollës fillore “Bajram Curri” në Strellc të Epërm, Haki Povataj, ishte vënë në ballor të udhëheqjes së arsimit shqip në komunë. Ai kishte marr guximin edhe për nxjerrjen e vulave të para me mbishkrimin “Republika e Kosovës”, sikurse edhe shumë veprimtari të tjera që të mbijetojë shkolla shqipe përballë një regjimi të egër. Kjo është vetëm një pjesë e veprimtarisë së Hakiut, ka thënë Rasim Selmanaj, kryetar i Komunës, i cili tutje figurën e tij e ka krahasuar me patriotët që kanë flijuar për shkollën shqipe, duke renditur këtu Dhaskal Todri, Papa Kristo Negovani e shumë të tjerë.
“Veprimtaria e Povatajt, kishte filluar epokën e re e cila po vinte në këto troje të gjakosura gjatë historisë”, është shprehur Selmanaj, i cili duke iu drejtuar pjesëmarrësve të kësaj akademie përkujtimore kë nënvizuar se çmimi për lirinë e vendit vazhdon edhe më. Komandanti i ish-ZOD-it, Ramush Haradinaj, edhe njëherë përballët padrejtësisht me Gjykatën e Hagës. Përballët në kohën kur në Kosovë ka ndodhur destabilizimi i skenës politike. Por e drejta është në anën e popullit. Për këtë jemi të bindur, njëjtë siç jemi të bindur se sakrifica e Haki Povatajt dhe shumë patriotëve të tjerë ka sjellë frytin e lirisë së Kosovës. Për të pranishmit e kësaj akademie, është shfaqur filmi dokumentar “Fletëza nga Ditari” i regjisorit Nimon Muçaj, kurse Hilmi Haradinaj, për kontributin e Haki Povataj, i ka ndarë mirënjohje familjes së tij.
