Zyra për Barazi Gjinore, në kuadër të Zyrës së Kryetarit të Komunës së Deçanit, në bashkëpunim me Drejtorinë për Bujqësi dhe Zhvillim Ekonomik, organizoi një takim tematik me titull: “Gratë në bujqësi dhe zhvillim ekonomik”.
Në takim morën pjesë gjithsej 21 pjesëmarrës (19 gra dhe 2 burra), përfaqësues të sektorit të bujqësisë dhe bizneseve lokale. Takimin e udhëhoqi znj. Ajne Iberhysaj, ushtruese e detyrës si Zyrtare për Barazi Gjinore.
Gjatë diskutimit u evidentuan disa nga nevojat dhe kërkesat kryesore të pjesëmarrëseve, përfshirë:
• Nevojën për pajisje bujqësore dhe mbështetje përmes skemave të zhvillimit rural, me fokus të veçantë në fuqizimin ekonomik të grave;
• Ndihmën në procedurat e aplikimit për grante dhe subvencione për gratë në bujqësi;
• Mbështetje teknike në hartimin e aplikacioneve, duke rekomanduar që Komuna të angazhojë një ekspert të trajnuar për këtë proces.
Drejtori për Zhvillim Ekonomik, z. Isuf Demhasaj, rikonfirmoi përkushtimin e institucionit për mbështetjen e bizneseve lokale, me theks të veçantë tek ato të udhëhequra nga gratë. Ai gjithashtu bëri të ditur se së shpejti do të organizohet Panairi Veror, ku gratë fermere do të kenë mundësinë të prezantojnë prodhimet e tyre bujqësore dhe artizanale.
Ndërkohë, znj. Syzana Krasniqi nga Drejtoria për Bujqësi, prezantoi shërbimet dhe lehtësimet që kjo drejtori ofron për gratë fermere dhe prodhueset bujqësore.
Komuna e Deçanit, përmes Zyrës për Barazi Gjinore, planifikon që në procesin e buxhetimit të ndajë mjete të veçanta për mbështetjen e grave në bujqësi dhe ekonomi, në bashkëpunim me drejtoritë përkatëse.
Në përmbyllje të takimit, u dakordua që Zyra e Kryetarit të angazhojë një ekspert të jashtëm, i cili do të ofrojë asistencë të drejtpërdrejtë për gratë në përgatitjen e aplikacioneve për përfitim nga skemat e granteve dhe subvencioneve.
Ky aktivitet është pjesë e angazhimit të vazhdueshëm të Komunës së Deçanit për fuqizimin e gruas, zhvillimin e qëndrueshëm të bujqësisë dhe promovimin e barazisë gjinore në të gjitha fushat e jetës.
