Sot u mbajt mbledhja e III-të e Këshillit Komunal për Siguri në Bashkësi (KKSB), e udhëhequr nga z. Izet Zenuni – Drejtor për Mbrojtje, Shpëtim dhe Shërbime Publike.
Rendi i ditës përfshinte:
1. Vlerësim mbi gjendjen e sigurisë në Komunën e Deçanit, nga Policia e Kosovës;
2. Diskutim dhe planifikim i aktiviteteve vetëdijesuese për përfshirjen e personave me aftësi të kufizuara, në bashkëpunim me OSBE-në;
3. Plani operativ për mirëmbajtjen e rrugëve dhe trotuareve për sezonin e dimrit;
4. Çështje të ndryshme.
Në lidhje me sigurinë në komunë, rreshteri Myrteza Lekaj raportoi se niveli i sigurisë është i qëndrueshëm dhe në nivel të kënaqshëm. Nga janari deri në tetor janë raportuar 280 raste penale, 26 raste të dhunës në familje dhe 187 aksidente trafiku. Nuk janë regjistruar incidente me karakter fetar, etnik apo të ngjashëm. Rreshteri Lekaj vlerësoi gjithashtu sjelljen qytetare të banorëve gjatë dy proceseve zgjedhore të këtij viti.
Për aktivitetet vetëdijesuese për personat me aftësi të kufizuara, znj. Gentiana Mazrekaj, Koordinatore e KKSB-së, informoi se shumë shpejt do të caktohet data e mbajtjes dhe qytetarët do të njoftohen me kohë.
Në lidhje me mirëmbajtjen e rrugëve dhe trotuareve gjatë dimrit, Drejtori, z. Izet Zenuni njoftoi se Komuna ka nënshkruar kontratën dhe ka hartuar planin operativ për pastrimin e rrugëve lokale dhe trotuareve. Për rrugët regjionale, kompetenca i takon Ministrisë së Infrastrukturës.
Tek pika “Të ndryshme”, u diskutuan çështje si qenët endacak dhe gjendja e sallës së sporteve në shkollën fillore të Dranocit, si dhe nevoja për renovimin e shkollës fillore në fshatin Voksh. Drejtoria e Arsimit po ndjek procedurat përkatëse dhe pritet zbatimi i tyre sipas afateve të planifikuara.
