Sot, në Gllogjan dhe Maznik, u bënë homazhe nga kryetari i Komunës, z. Bashkim Ramosaj, së bashku me bashkëpunëtorë, familjarë të dëshmorëve dhe qytetarë të shumtë, të cilët me praninë e tyre i dhanë edhe më shumë madhështi kësaj dite përkujtimore. Në një atmosferë të mbushur me emocione dhe respekt, u zhvillua edhe ecja tradicionale “Shtegu i Lirisë”, duke rikujtuar rrugën e sakrificës dhe të lirisë.
Në këtë përvjetor të rënies heroike, përkujtuam me dhimbje, por edhe me krenari të thellë, Shkëlzen Haradinaj, Fatmir Nimanaj, Hasim Halilaj, Luan Nimanaj, Agim Selmanaj dhe Enver Haradinaj, burra që me jetën e tyre u bënë themel i lirisë sonë.
Ata ishin ndër të parët që iu përgjigjën thirrjes së atdheut, duke u bërë simbol i qëndresës, guximit dhe dashurisë për vendin. Emrat e tyre janë të gdhendur përgjithmonë në historinë tonë kombëtare dhe do të mbeten udhërrëfyes për brezat që vijnë.
Sot, më shumë se kurrë, ndjejmë përgjegjësinë për ta ruajtur amanetin e tyre dhe për ta çuar përpara idealin për të cilin ata ranë. Liria jonë është dëshmi e sakrificës së tyre dhe obligim për secilin prej nesh.
