Sot u mbajt mbledhja e Komitetit për Komunitete, e udhëhequr nga kryesuesi i Komitetit, z. Shkëlzen Berisha.
Në mbledhje morën pjesë anëtarët e Komitetit për Komunitete, drejtoresha për Buxhet dhe Financa, znj. Dafina Cacaj, përfaqësuesi i UNMIK-ut, përfaqësues të Policisë së Kosovës, si dhe përfaqësues të KFOR-it në Kosovë.
Gjatë mbledhjes u shqyrtuan këto pika të rendit të ditës:
• Miratimi i procesverbalit nga mbledhja e kaluar;
• Raporti nga Zyra Lokale për Komunitete (ZLK);
• Raporti nga Drejtoria Komunale për Buxhet dhe Financa lidhur me Kornizën Afatmesme Buxhetore, mundësitë për ndarjen e buxhetit për komunitetet dhe planet për investime në infrastrukturë në vendbanimet ku jetojnë komunitetet jo-shumicë;
• Të ndryshme.
Në kuadër të raportimit nga Zyra për Kthim dhe Komunitete, z. Shaban Peqinoviq njoftoi se gjatë kësaj periudhe është riatdhesuar një qytetar. Ai gjithashtu bëri të ditur se zyra ka ofruar mbështetje për komunitetet në përgatitjen e dokumentacionit dhe aplikimeve për subvencione në ministri, me qëllim realizimin e projekteve për ndërtimin dhe renovimin e shtëpive.
Ndërkaq, drejtoresha për Buxhet dhe Financa, znj. Dafina Cacaj, raportoi lidhur me kërkesat e paraqitura nga Komiteti për Komunitete, si dhe prezantoi mundësitë buxhetore dhe planifikimet financiare për mbështetjen e projekteve dhe nevojave të komuniteteve.
