Kryetari i Komunës, z. Bashkim Ramosaj, së bashku me ish-Kryeministrin e Republikës së Kosovës, z. Ramush Haradinaj, mirëpriti sot në Komunën e Deçanit delegacionin e lartë të NATO-s, të udhëhequr nga Admirali George M. Wikoff, Komandant i Komandës Aleate të Forcave të Përbashkëta të NATO-s në Napoli, si dhe Komandantin e KFOR-it, Gjeneral Major Özkan Ulutaş, me bashkëpunëtorët e tyre.
Gjatë takimit u diskutua për situatën e sigurisë në Komunën e Deçanit, bashkëpunimin e vazhdueshëm me KFOR-in, si dhe për rolin e rëndësishëm që NATO ka pasur dhe vazhdon të ketë në ruajtjen e paqes, sigurisë dhe stabilitetit në Kosovë.
Me këtë rast, Kryetari Ramosaj shprehu mirënjohjen për mbështetjen dhe përkushtimin e vazhdueshëm të NATO-s dhe KFOR-it ndaj sigurisë së qytetarëve, duke ritheksuar gatishmërinë për vazhdimin dhe forcimin e bashkëpunimit me partnerët ndërkombëtarë.
Komuna e Deçanit mbetet e përkushtuar për të ruajtur një mjedis të qetë, të sigurt dhe mikpritës, në shërbim të të gjithë qytetarëve.
