Forcat paqeruajtëse të KFOR-it italian, të vendosura në hapësirat e pushimores së fëmijëve “Pishat e Deçanit”, pritet që së shpejti të lirojnë ato. Ndërkohë, në Deçan udhëheqja komunale, bashkë me udhëheqjen e Brigadës Shumëkombëshe Prendim të KFOR-it, të martën kanë kanë biseduar për modalitetet e shfrytëzimit të mëtejmë të saj, duke shqyrtuar projektin, përkatësisht ofertën e CARITAS-it për menaxhim humanitar të kapaciteteve të kësaj pushimoreje.
“Kemi specifikuar të gjithë projektin e ofruar nga CARITAS-i, i cili ka karakter të menaxhimit humanitar të kapaciteteve atraktive të kësaj pushimoreje për 30 vitet e ardhshme, gjithnjë në të mirë të popullatës së këtushme, e cila do të punësohet dhe natyrisht do të ketë edhe përfitime të tjera humanitare”. Kështu, ka thënë kolonel Davide Di Bartolo, komandant i BSHP të KFOR-it, i cili pastaj ka treguar se objektin e marrë nga UNMIK-u pasi do t’ia kalojmë atij, prona do t’i kthehet Komunës. Madje, ai ka theksuar se “ nëse vazhdojmë të diskutojmë ligjshmërinë do të kalonin edhe 10 vjet të tjerat deri të definohet në tërësi, duke aluduar në pengesat që mund të dalin rrugës së proceduarave dhe sipas tij kjo do të ishte rruga me e shkurt e zgjidhjes së këtij problemi.
Qëllimi është i mirë, por mbetet të shqyrtohen modalitetet dhe oferta, ka thënë Rasim Selmanaj, kryetar i Komunës, i cili ka kërkuar kohë për realizimin e të gjitha procedurave ligjore, ngase sipas tij, vendimin duhet marrë në legjislativin komunal. “Unë kërkojë që të ngritët një komision miks nga KFOR-i, UNMIK-u, CARITAS-i dhe Komuna, i cili profesionalisht dhe ligjshmërisht do të ofrojë modalitetet dhe ofertën e qartë, e cila pas shqyrtimit në Kuvend do të merrte përkrahjen e legjislativit” është shprehur kryetari Selmanaj, duke e përkrah projektin si ide të mirë, por që ka nevojë të shqyrtohen të gjitha detalet e tij. “Disa detaje duhet sqaruar deri në fund, natyrisht nga ekspert të kësaj fushe’’, ka thënë ai, duke kujtuar projektin vetëm si një negociatë qëllimmirë dhe të karakterit humanitar.
Ndërkaq, Halil Tolaj, drejtor i Drejtorisë për Ekonomi dhe Zhvillim, ka insistuar që lidhur me lirimin e kësaj pushimoreje të mos ketë kushtëzime, sidomos nga UNMIK, i cila nuk ka mandate as nga Pakoja e Ahtisarit. “ Me rëndësi është që prona t’i kthehet Komunës, sepse ishte dhe duhet të mbetet e saj, kurse oferta e CARITAS-it, duhet shqyrtuar mirë dhe të definohet çdo detal i saj”, ka thënë ai, i cili po ashtu si parafolësit tjerë ka kërkuar ngritjen e komisionit miks të përbërë nga të gjithë faktorët relevant.
Në këtë takim është vendosur unanimisht për ngritjen e një komisioni në përbërje nga KFOR-i, UNMIK-u, Komuna dhe CARITAS-i, i cili pas shqyrtimit të gjithë projektit, do të prezantojë ofertën në Kuvendin Komunal, përkatësish në seancën e ardhshme të legjislativit komunal. Ndryshe, pushimorja e fëmijëve dhe rinisë “Pishat e Deçanit”, ka 5 pavijone me 55o shtretër, objektet përcjellëse: salla, kuzhina, terrenet sportive etj, dhe njihet si vendi më atraktivë jo vetëm në Kosovë, ku përpara ishte pikëtakimi i të gjithë fëmijëve të Kosovës dhe më gjerë. Lirimi i saj dhe rikthimi në destinimin që e kishte, do të thotë shumë për fëmijët dhe të rinjtë e vendit.
