Disa mijëra qytetarë kanë protestuar të hënën në Deçan në kundërshtim të vendimit të Dhomës së Veçantë të Gjykatës Supreme të Kosovës, për fuqizimin e marrëveshjes që lejon bartjen në pronësi të Manastirit të Deçanit të rreth 23 hektarëve tokë të ndërmarrjeve lokale ,,Apiko” dhe ,,Iliria”.
Adem Lushaj, nga këshilli organizativ i protestës, ka thënë në fjalën e tij se deçanasit po e dëshmojnë çdo ditë e më tepër se nuk do të lëshojnë pe në kërkesën e tyre për drejtësi dhe mbrojtje të pronës. “Me këtë protestë të dytë po e dëshmojmë se ne qytetarët e Deçanit dimë të respektojmë institucionet tona, dimë të ruajmë vlerat tona kulturore, por dimë edhe të mos pajtohemi me vendime që shkojnë në dëm tonin. Deçanasit nuk do të pranojnë kurrë vendime të imponuara politike dhe diskriminuese, aq më pak vendime të ardhura nga një qeveri që qëllim të vetin e ka pasur dhe e ka vrasjen dhe përndjekjen e shqiptarëve”, ka thënë Lushaj.
Duke ripërsëritur shqetësimin për heshtjen dhe neglizhimin që qeveria dhe deputetët e Kosovës po e bëjnë ndaj kësaj çështje, Lushaj ka kërkuar nga ta dhe nga organet e drejtësisë që të mos bëjnë asgjë më shumë sesa ta mbrojnë ligjshmërinë dhe kushtetutshmërinë e vendit. Ai duke folur në emër të këshillit organizativ por edhe të qytetarëve deçanas, ka apeluar edhe tek ambasadat e huaja në Kosovë, e në veçanti tek ajo amerikane që ta ndihmojnë Deçanin në realizimin e projekteve për zhvillimin ekonomik dhe të mos imponojnë vendime të cilat janë të dëmshme dhe e pengojnë zhvillimin. Edhe qytetarët e komunë së Deçanit, të cilët kishin dalurë për te protestuar thanë se kjo që po ndodhë është padrejtësi e madhe që po u bëhet atyre. ”Pushtetarët tanë po thonë se Kosova është e pavarur, por në fakt në Deçan nuk ka pavarësi. Nuk janë në pyetje vetëm këta 23 hektarë, por janë edhe 1000 hektarë tjerë që janë shpallur zonë e mbrojtur nga UNMIK-u,.Për këtë shkak ne kemi ngecur ekonomikisht dhe papunësia ka kaluar në 70 %. Ne nuk kemi fabrika dhe të gjitha shpresat tona për zhvillim i kemi në atë zonë, ku mund të ketë turizëm pranveror, veror dhe dimëror”, ka thënë Xhavit Kuçi, i cili edhe personalisht i ka 1.5 hektarë në zonën e mbrojtur, e të cilat tash e sa vjet nuk ka të drejtë t’i shfrytëzojë në asnjë formë.
Sipas deçanasve, Manastiri dhe toka rreth saj gjithmonë i ka takuar popullit e jo qeverive e pushteteve që kanë kaluar, prandaj e tillë duhet të mbetet edhe sot. Organizatorët kanë paralajmëruar se protesta të tilla do të ketë edhe në të ardhmen, derisa të dilet me një vendim të drejtë rreth kësaj çështje.
