Nga reshjet e ditëve të fundit si pasojë e daljes së Lumit të Loqanit nga shtrati janë përmbytë sipërfaqe të mëdha të ekonomive familjare dhe pronave në fshatin Baballoq, duke vërshuar sipërfaqe të tokave bujqësore mbi lagjet Humaj , Gjocaj dhe Qallaku.
Sasi të mëdha të ujit janë shpërndarë përgjatë këtyre lagjeve duke vërshuar oborret e shtëpive, rrugët dytësore dhe aksin kryesor të rrugës nga hyrja e fshatit deri te ura e cila më pastaj lidhet me fshatin Gramaqel. Dalja e sasive të mëdha të ujit nga shtrati i lumit kanë diktuar pengesat që janë krijuar si pasojë e ngushtimit të shtratit të lumit nga pronarët e tokave. Dëmet nga përmbytjet janë evidentuar të jenë të mëdha kryesisht lagjet Humaj dhe Gjocaj në Baballoq. Nga erozioni ka pësuar rruga dytësore në lagjen Gjocaj me gjatësi prej mbi 500m. Gjatë inspektimit është konstatuar se është tepër e domosdoshme të merren masat preventive dhe të reagimit për stabilizimin e kësaj gjendjeje. Në këtë drejtim Drejtoria Komunale për Shërbime Publike,Mbrojtje dhe Shpëtim, ka ndërmarrë aksion për hapjen dhe pastrimin e Lumit të Lloqanit në segmentin e rrjedhës i cili kalon nëpër fshatin Baballoq. Për këtë Drejtoria në fjalë ka angazhuar kompaninë “ Lika Trade” për kryerjen e këtyre punëve e cila me ekskavator dhe mjete tjera ka realizuar me sukses hapjen shtratit të lumit në segmentin me gjatësi prej 2 km, duke filluar nga pjesa në hyrje të fshatit deri në fshatin Rastavicë. Ndryshe, nevojat për zgjerimin e shtratit të këtij lumi edhe në segmente tjera është domosdoshmëri.
