Në takimin e së enjtes të Këshillit Komunal për Siguri në Bashkësi, Deçani është vlerësuar njëra ndër Komuna më të qeta në Kosovë. Kryetari i Komunës z.Rasim Selmanaj, i cili është edhe kryeses i këtij organi të rëndësishëm për siguri, pasi ka vlerësuar gjendjen e qetë në komunën e tij, ka thënë se arrestimet e fundit të tre qytetarëve të Deçanit, nga njësiti i policisë speciale kanë reflektuar keq tek qytetarët, ngase sipas tij policia këto arrestime ka mundur t’i bëjë sipas procedurave të zakonshme dhe pa pompozitet. Ndryshe, Selmanaj ka kërkuar angazhim më të madh të policisë lokale në mbajtjen e rendit publik në qytete dhe veçmas në ndërmarrjen e masave në trafik dhe largimin e automjeteve nga trotuaret, të cilat pengojnë lëvizjen e lirë të qytetarëve. Edhe togeri i policisë Flamur Frrokaj, gjendjen e sigurisë e ka vlerësuar të qetë. Sipas tij ka rënje të veprave të prerjeve ilegale në pyjet e kësaj komune, por nga ana tjetër hetohen rritje të vjedhjeve të shtëpive nëpër fshatra, pronarët të cilave gjenden në botën e jashtme. Ai është ankuar në kapacitetet e vogla të policisë për ti mbuluar të gjitha resorët dhe nevojat e mëdha edhe për asistencat të ndryshme, duke treguar se për këtë mungesë është e njoftuar edhe Drejtoria Rajonale e Policisë. Në këtë takim u tha se policia bashkë me Drejtorinë e Shërbimeve Publike, do të angazhohet në aksionin e vetëdijesimit të qytetarëve të cilët me parkimin e automjeteve të tyre nëpër trotuare dhe vende tjera publike pengojnë lëvizjen e lirë të qytetarëve dhe krijojnë një imazh të keq. Ndërkaq, Admir Hasanaj, kë kërkuar angazhimin e policisë, siç tha ai të ngasësve të automjeteve edhe nga nxënësit dhe të miturit, të cilët shpesh bllokojnë rrugën në drejtim të shkollave të mesme të qytetit.
