Kuvendi jep “vizën” për ndërtimin e tri hidrocentraleve në Grykën e Deçanit.
Në mbledhjen e dytë të radhës të Asamblesë Komunale në Deçan të gjithë asambleistet unanimisht kanë votuar pro ndërtimit tri hidrocentraleve në Grykën e Deçanit ,përkatësisht përgjatë rrjedhës së lumit të këtushëm “Lumbaridhi”. Kryetar i Komunës, Rasim Selmanaj i cili paraprakisht kishte nënshkruar memorandumin më përfaqësuesin e kësaj kompanie “Kelkos Energy”, ka shpalosur projektin e “Kelagut”, i cili pos menaxhimit të hidrocentralit “Lumbadhi” në Deçan në menaxhimin e saj ka edhe 65 hidrocentrale të tjera në Evropë.
Sipas kryetarit Selmanaj, kjo kompani e cila ka garancinë bankare në vlerë prej 400 milionë eurosh, për ndërtimin e tri hidrocentraleve në Grykën e Deçanit, “Lumbadhi ll”, “Belleja” dhe “Deçani”, do të investojë mbi 55 milion euro, ndërkohë kapacitetet prodhuese të energjisë arrijnë në 23 MGW. Gjithnjë, sipas kryetarit Selmanaj, kjo kompani nëse merr përkrahjen edhe të institucioneve përkatëse qeveritare, është e gatshme që realizimin e këtij projekti të filloi në pranverë me premtimin se të gjitha punët do t’i përfundojë në afatin rekord. Selmanaj, po ashtu ka vlerësuar se prodhimi i energjisë së tillë është shumë i rëndësishëm edhe për vendin, jo vetëm në aspektin e furnizimit, por edhe në përmbushjen e standardeve Evropiane, ndaj është shprehur optimist se projekti i kësaj kompania do ta gjejë përkrahjen edhe te organeve qeveritare të vendit.
