Kryetari i Komunës së Deçanit Rasim Selmanaj ,Blerand Stavileci, ministër i MBPZHR në praninë e shumë qytetarëve dhe fermerëve të fshatrave të Deçanit, në Prapaqan të Deçanit,
, kanë përuruar kanalin për ujitjen e tokave, ndërkohë i pari i kësaj ministrie ka premtuar investime edhe për vazhdimin e punimeve të kanalit tjetër “Vija e Gështenjës”, nga i cili do të ujitën pronat e tri fshatrave të kësaj komune. Për projektin e realizuar në Prapaqan, kjo ministri ka investuar mbi 285 mijë euro, duke ndërtuar kështu kanal të betonuar në gjatësi prej 6 kilometrash, nga i cili do të ujiten mbi 1000 hektar të pronave të Isniqit, Prapaqanit. Papiqit etj.
“Nuk do të kursejmë paratë për avancimin e prodhimtarisë bujqësore, qofshin këto nga fondet e ministrisë ,por edhe të donatorëve të shumët të jashtëm, të cilët po ashtu sikurse edhe ne, janë shumë të gatshëm të ndihmojnë zhvillimin e bujqësisë”, ka thënë ministri Stavileci, duke përkujtuar se Deçani me potencialin e madh të resurseve dhe i ka të gjitha parakushtet për zhvillimin e kësaj dege të ekonomisë. Sipas Stavilecit, dera e ministrisë së tij, është e hapur për të gjitha ata që ofrojnë projekte atraktive, qofshin fermer, blegtor, industrialist, ngase kështu jemi zotuar që në bazën e këtyre projekteve të ndërtojmë të ardhmen zhvillimore të kësaj dege të ekonomisë e cila në rrethanat e vendit, është shumë profitabile dhe dosido është potencial i zbutjes së papunësisë dhe varfërisë.
Ai, pasi ka premtuar mbështetjen e projektit , përkatësit kanalit të ujitjes “Vija e Gështenjës”, nga i cili do të ujitën me qindra hektar të pronave të tri fshatrave të kësaj komune, ka thënë se në nivel të Qeverisë është shtuar interesimi, por edhe përkrahja financiare për zhvillimin e bujqësisë. Sipas tij, gjatë vitit të ardhshëm në Kosovë do të realizohen 27 projekte kapitale, të cilat do ti bëhen krah i fuqishëm për zhvillimin e bujqësisë, ndërkohë jo vetëm sa për të plotësuar nevojat e vendit, por edhe për eksportin e disa produkteve bujqësore, të cilat veç janë nisur në rrugë të mirë.
Ndërkaq, i pari i kësaj Komune, Selmanaj, ka thënë se “kjo ministri ka bërë investime të dukshme në këtë komunë, duke përmendur kështu kanalin e Belegut, tani të Prapaqanit”, kurse sa i përket projektit të premtuar nga ministri Stavileci, ai është deklaruar se në të njëjtën kohë po përfitojmë investime, kurse nga ana tjetër po e rikthejmë besimin tek donatorët e jashtëm, të cilit për shkak të dështimeve në realizimin e projektit, tri vjet më pari ia kishin kthyer shpinën Deçanit. Me këtë investim në vazhdimin e punimeve të kanalit “Vija e gështenjës”, do të hiqemi nga “lista e zezë”, në të cilën vite më parë, ishim te Komisioni Evropian, i cili po financonte këtë projekt, dhe tani na është hapur dera në të gjitha instancat e vendit dhe ato ndërkombëtare, ka thënë Selmanaj, i bindur e bujqësia në Deçan do merr rrugën e duhur të zhvillimit të saj. Ministri Stavileci, dhe deputetet Adem Grabovci, Safete Hadërgjonaj, bashkë me udhëheqjen komunale kanë vizituar disa nga fermerët e kësaj komune, prodhues të dredhëse dhe të produkteve të mishit.
