Tensionimi i gjendjes pozitë-opozitë, jo vetëm që nuk ka shënuar progres. Përkundrazi, tensionet janë rritur edhe në seancën e së enjtes, ku pas fjalës së kryetarit të Komunës, z.Rasim Selmanaj, opozita serish ashtu si në seancën paraprake e ka braktisur atë. Ende pa filluar shqyrtimi i pikave të rendit të punës,opozita ashtu si herën e parë ka kërkuar dokumentet shtesë lidhur me raportin e shpenzimeve të vitit të kaluar. Mirëpo, kryetari Selmanaj, pasi ka premtuar se kjo do të ndodhë në seancën e ardhshme, i revoltuar me qëndrimin e opozitës që sipas tij nuk po i shef zhvillimet në Komunë, ka propozuar syze për të.
“Ata që duan dhe lidhin inate për ti parë dhe pranuar zhvillimet, le të vendosin syze”, ka thënë kryetari Selmanaj, duke nënvizuar se realiteti tregon për investime disa milionëshe në komunë prej se ka marr mandatin ai. Ndërkaq,për rastin e parë të braktisjes së seancës nga opozita, ai i kishte propozuar asaj, transparencë edhe me autobus, duke besuar se realiteti në terren flet për ndryshme dhe investime të mëdha. Ai, në këtë rast qëndrimin e opozitës e ka quajtur “jo korrekt dhe jo demokratik”, ndërkohë që është deklaruar për transparencë dhe llogaridhënie për çdo cent të shpenzuar.
