Në betejën e 11 shtatorit të vitit 1998, që ishte zhvilluar në afërsi të trekëndëshit kufitar Kosovë-Shqipëri-Mali i Zi
kishte rënë edhe dëshmori i kombit Xhevat Sejfijaj, por trupi i tij kishte humbur pa gjurmë. Megjithatë, 12 vite plotë ankth të familjes së tij, por gjithmonë me shpresë reflektuan në kthimin e eshtrave të tij nga Serbia, për t’i rivarrosur ata të hënën me nderime të madha në kompleksin memorial “Dëshmorët e Kombit” në Gllogjan.
Para se të bëhej rivarrimi i eshtrave të këtij dëshmori, në Deçan në përkujtim të veprës së tij është mbajtur Akademi Përkujtimore. Në praninë e familjeve të dëshmorëve, përfaqësuesve të shoqatave të dala nga lufta e UÇK-së dhe udhëheqjes komunale, Rasim Selmanaj, kryetar i Komunës, pasi ka folur për figurën e dëshmorit, ka thënë se “ Dita e sotme shënon një ngjarje të dhembshme, por edhe krenare. Trupi i këtij dëshmori prej sot do të prehët në përjetësi në kompleksin memorial “Dëshmorët e Kombit” në Gllogjan, në vendlindjen e tij, në tokën e Kosovës së Pavarur, për çka rënë dhe të gjithë të rënit tjerë”. Ai ka shtuar se Xhevat Sejfijaj, sot po iu bashkohet në përjetësi bashkëluftëtarëve të tij, Shkëlzen e Luan Haradinaj, Sokol Sejfijaj, Fatmir Nimanaj dhe dhjetëra dëshmoreve të tjerë.
Për figurën e dëshmorit ka folur edhe bashkëluftëtari i tij, Jashar Dobraj, njëkohësisht kryetar i Asamblesë Komunale, i cili ka veçuar pjesëmarrjen e tij në shumë beteja në Dukagjin, duke e cilësuar atë si trim dhe strateg të luftës. Dobraj ka evokuar heroizmin e këtij dëshmori nëpër shumë beteja, duke thënë se me trimërinë e tij na jepte “zemër dhe shpirt” deri në rënien e tij sublime.Në këtë akademi kanë folur edhe Nasim Haradinaj dhe Sabrije Sejfijaj. Në emër të familjes ka përshëndetur baba i dëshmorit Muharrem Sejfijaj, kurse mbi varrin e dëshmorit janë vënë kurora lulesh. Ndërkaq, në gusht të këtij viti, për te dhe dëshmorët që ranë në këtë betejë, në vendin e rënies ishte zbuluar pllaka përkujtimore.
