Kryetari i Komunës së Deçanit z.Rasim Selmanaj dhe Koordinatori Shpend Stojkaj janë pritur dje në një takim nga Drejtori i përgjithshëm i KEDS-it Vedi Yeslkiliç. Ky takim i cili vije në vazhdën e shumë takimeve që nga marrja e Kompetencave të KEDS-it nga Qeveria e Kosovës, ka sjellë rezultat, sa i përket rikthimit në punë të 15 punëtorëve që KEK-u i largoj padrejtësisht nga puna një vit me parë. Kryetari i Komunës së Deçanit z.Rasim Selmanaj, edhe në këtë takim nuk ka pranuar asnjë kompromis tjetër veç rikthimit në punë të 15 punëtorëve të nënë distriktit në Deçan. “ Ne që në fillim kemi thënë së suspendimi i këtyre punëtorëve është bërë me teke të njerëzve në krye të KEK-ut, këtë e ka dëshmuar edhe vendimi i gjykatës, që ka qenë në favor të punëtorëve “ është shprehur Selmanaj. Këmbëngulësia e kryetarit Selmanaj ka rezultuar suksesshëm, pasi që Drejtori i përgjithshëm i KEDS-it Vedi Yeslkiliç, pas konsultimeve me bordin, ka marrë vendim që 15 punëtorët e nën distriktit të Deçanit, të kthehen në vendet e tyre të punës. Ky kthim i punëtorëve, është pritur mjaft mirë nga kryetrari Selmanaj por edhe nga vetë ata. “ Unë sot ndihem shumë mirë kur ju komentoj ju lajmin se dje së bashku me koordinatorin Shpend Stojkaj dhe me drejtorin e përgjithshëm të KEDS-it Vedi Yeslkiliç, arritëm marrëveshje që ju të vazhdoni punën në vendet e juaja të mëhershme” tha kryetari Selmanaj gjatë një takimi sot me 15 punëtoret e nënë distriktit. Të gjithë punëtorët një zëri shprehën falënderimet e përzemërta ndaj kryetarit “ Ne të jemi shumë falënderues, për këmbëngulësin e juaj zotëri kryetarë që më në fund të triumfoj e vërteta. Siç e din ju dhe të gjithë ne jemi larguar për teke personale të disa udhëheqësve të KEK-ut. Ky vit nuk ka qenë i lehtë as për ne as për familjet tona, mirëpo falë angazhimit të juaj, ne dhe familjet tona sot ndihemi të lumtur” tha në emrin e gjithë punëtoreve Shpend Stojkaj. Ndryshe sipas marrëveshjes së arritur mes Kryetarit z.Rasim Selmanaj dhe Drejtorit të përgjithshëm të KEDS-it Vedi Yeslkiliç 15 punëtoret e suspenduar nga KEK-u një vit më parë, do të rinisin punën me 26 qershor 2013.
