Zyra për Barazi Gjinore, në bashkëpunim me Drejtorinë për Shëndetësi dhe nxënësit e Institucionit për Arsimin dhe Aftësimin Profesional (IAAP) “Tafil Kasumaj”, organizoi një punëtori me temën “Edukimi Shëndetësor”, e udhëhequr nga profesori i Mjekësisë, Dr. Elton Kuçi.
Në këtë aktivitet morën pjesë 35 nxënës (23 vajza dhe 12 djem).
Drejtoresha për Shëndetësi, znj. Agnesa Vokshi, theksoi se edukimi shëndetësor për të rinjtë është një ndër prioritetet e Drejtorisë që ajo udhëheq. Ajo nënvizoi rolin thelbësor të edukimit të vajzave në fushat e ushqyerjes së shëndetshme, higjienës dhe përfshirjes në aktivitete fizike, si elementë të rëndësishëm për mirëqenien e përgjithshme. Në këtë kontekst, Qendra Rinore “Fitne Ramosaj” ofron hapësira të përshtatshme për zhvillimin e aktiviteteve sportive që ndikojnë pozitivisht në zhvillimin fizik dhe emocional të të rinjve.
Znj. Vokshi rikonfirmoi përkrahjen e saj të vazhdueshme për nisma të tilla edukuese, si dhe mbështetjen e pakushtëzuar të Kryetarit të Komunës, z. Bashkim Ramosaj.
Gjatë ligjëratës, Dr. Elton Kuçi theksoi se edukimi shëndetësor nuk kufizohet vetëm në informim, por është një proces i vazhdueshëm dhe gjithëpërfshirës, që përfshin profesionistët shëndetësorë, familjen, shkollën dhe komunitetin. Ai potencoi se përmes edukimit shëndetësor, të rinjtë fitojnë njohuri dhe aftësi për të kujdesur për veten dhe të tjerët, duke kontribuar në ndërtimin e një shoqërie të shëndetshme.
Në këtë puntori u trajtua për:
• Ushqyerja e shëndetshme dhe aktiviteti fizik
• Higjiena personale dhe ambientale
• Vaksinimi dhe parandalimi i sëmundjeve ngjitëse
• Kujdesi ndaj shëndetit mendor dhe emocional
• Ndërgjegjësimi dhe parandalimi i zakoneve të dëmshme (duhani, alkooli, substanca narkotike)
Në përmbyllje, Dr. Kuçi theksoi se edukimi shëndetësor duhet të përshtatet me moshën, kulturën dhe nevojat specifike të popullsisë, në mënyrë që të ketë ndikim të qëndrueshëm në ruajtjen dhe përmirësimin e shëndetit publik.
