Nën kujdesin e kryetarit të Komunës, z. Bashkim Ramosaj, dhë nënkryetarit, z. Sami Cacaj, patëm nderin e veçantë që të mblidhemi për të vlerësuar dhe nderuar një prej personaliteteve më të shquara të Forcave të Armatosura të Republikës së Shqipërisë, Nënkolonel Besnik Fana, duke i ndarë titullin e lartë “Qytetar Nderi”.
Ky titull është një shenjë mirënjohjeje dhe respekti për përkushtimin, sakrificën dhe kontributin e tij të jashtëzakonshëm në mbrojtjen e atdheut, ruajtjen e paqes dhe sigurisë në Kosovë, rajon dhe me gjerë, e veçanërisht në Komunën e Deçanit.
Besnik Fana, i lindur në një familje patriotike në Topojan të Kukësit, djalë i një Ushtaraku Madhor, vazhdoi rrugën e njëjtë ku pasi përfundoj Shkollën e Mesme Ushtarake dhe Akademinë e Forcave Tokësore në Turqi, në vitin 2003 është titulluar Oficer dhe ka filluar karrierën e tij në Forcat e Armatosura të Republikës së Shqipërisë. Gjatë karrierës së tij ka marrë pjesë në 8 Misione si; Irak ku dhe është plagosur, Afganistan në Misionet Luftarake (Combat) me forcat Speciale, dhe së fundmi në Kosovë ku dhe ka mbajtur detyrën e zëvendës Komandantit të Komandës Rajonale Perëndimore të KFOR-it.
Në emër të tij, sot nderojmë jo vetëm një individ, por edhe të gjithë ushtarët dhe oficerët që kanë dhënë dhe japin çdo ditë gjithçka për lirinë, sigurinë dhe të ardhmen e kombit tonë. Sakrificat e tyre, shpesh të heshtura, janë themelet mbi të cilat ndërtohet paqja dhe stabiliteti i vendit tonë.
Urime të përzemërta, Nënkolonel Fana! Ky titull është një dëshmi e respektit dhe dashurisë së madhe që qyteti ynë ka për ju dhe për gjithçka që përfaqësoni.
