Përkrahja e Qeverisë nuk ka munguar për shumë projekte kapitale, por kjo ka nevojë të rritet edhe më, është thënë në takimin me qytetar. Në seancën e parë publike ku është raportuar për punën gjashtëmujore të Ekzekutivit Komunal, qytetarët për herë të parë janë shprehur të kënaqur me punën e Ekzekutivit Komunal dhe në mungesë të kritikave eventuale, ata më shumë kanë bërë pyetje, por edhe kërkesa për problemin e ujit të pijes, ujitjes së tokave, infrastrukturës shkollore për mjediset e tyre. Ndërkaq, kryesuesi i këtij takimi, Jashar Dobaraj, është shprehur i kënaqur për numrin e pjesëmarrësve në këtë seancë e cila edhe nuk ka zgjatur shumë.
Pasi ka përmendur realizimin e një varë projektesh gjatë mandatit të deritanishëm të tij, Rasim Selmanaj, kryetar i Komunës, ka numëruar edhe disa nga projektet të cilat kanë nisur të realizohen sivjet. “Deri më tani kemi realizuar projekte të shumta,por kemi edhe shumë punë që Deçani me rrethinë të krijojë të gjitha parakushte për zhvillim dhe mirëqenën e të gjithë qytetarëve”, ka thënë ai, duke treguar se aktualisht po punohet në disa fronte të punës në realizimin e projekteve për të cilat në vazhdimësi kemi marrë edhe përkrahjen e Qeverisë.
Pas vazhdimit të punimeve në projektet e nisura, sipas kryetarit Selmanaj,së shpejti do të fillon puna në realizimin e projektit të ndërtimit të ujësjellësit për 10 fshatra, pastaj asfaltimit të rrugës më problematike për Maznikë, zgjerimit të rrugës “Haki Pavataj” në qytet, por edhe të disa projekteve të tjera të rëndësishme. Ai, në vazhdim ka njoftuar qytetarët se në fokus të veprimit janë disa nga prioritetet që garantojnë mundësi zhvillimi, kurse sa i përket investimeve kapitale dhe të shpenzimit të parasë publike është deklaruar: “Për gjithçka dhe në çdo kohë do të jemi transparent dhe të gatshëm për llogaridhënie për çdo cent të shpenzuar”. Madje ai, është shprehur optimist se do të rritet përkrahja e Qeverisë, por edhe e donatorëve për investime në Deçan, i cili sipas tij, përpara nuk e kishte këtë përkrahje.
Me që qytetarët e pranishëm dhe pjesëmarrësit në debat dukeshin të kënaqur me punën e Ekzekutivit dhe personalisht të vet kryetarit Selmanaj, ata kanë kërkuara intervenimin e Komunës për sigurimin e ujit për pije, ujitjen e tokave etj. Metë Curri, nga Strellci, ka treguar se “të dyja strellcet vetëm dy orë në ditë furnizohen me ujët të pijes”, dhe sipas tij nevojitet riparimi i ujësjellësit të vjetruar dhe shtimi i kapaciteteve të ujët”. Ndërkaq, qytetarët Mon Selmanaj dhe Rasim Mulaj, kanë kërkuar investime për objektet shkollore në fshatrat Llukë e Epërme dhe Rastovicë, derisa pjesëmarrësit tjerë në debat njëkohësisht kanë kërkuar ndihmën e Komunës për hapjen e kanaleve për ujitje, të cilat sipas tyre për shkak të punimeve në infrastrukturën rrugore, në asnjë fshat nuk janë funksionale.
