Në ambientet e Komunës së Deçanit u mbajt debati publik për Projekt-Buxhetin për vitet 2026–2028, me fokus të veçantë në grantin specifik për sektorin e Arsimit. Ky debat u organizua në kuadër të angazhimit të komunës për transparencë buxhetore dhe përfshirje të drejtpërdrejtë të të gjithë akterëve relevantë në procesin e planifikimit dhe ndarjes së buxhetit.
Debatin e hapi drejtoresha për Buxhet dhe Financa, znj. Dafina Cacaj, e cila ofroi një prezantim të detajuar mbi strukturën dhe përmbajtjen e projekt buxhetit të propozuar për Arsimin. Në debat morën pjesë edhe drejtori për Arsim, z. Besnik Hulaj, drejtorët e shkollave fillore dhe të mesme të komunës, si dhe zyrtarë të tjerë të administratës komunale.
Gjatë prezantimit të saj, znj. Cacaj sqaroi mënyrën e ndarjes së mjeteve financiare brenda këtij granti, duke theksuar kategoritë buxhetore që përfshijnë investimet në infrastrukturë, përmirësimin e kushteve të mësimdhënies, si dhe mbështetjen për zhvillimin profesional të stafit arsimor. Ajo nënvizoi rëndësinë e përfshirjes aktive të institucioneve arsimore në këtë proces, me qëllim që buxheti të reflektojë sa më drejtë nevojat reale në terren.
Drejtorët e shkollave patën mundësinë të paraqesin drejtpërdrejt kërkesat, shqetësimet dhe prioritetet e tyre për periudhën në vijim, duke përmendur nevojën për rinovimin e objekteve shkollore, furnizimin me pajisje didaktike,si dhe çështje të tjera që lidhen me funksionimin efikas të shkollave.
Pjesëmarrësit zhvilluan një diskutim konstruktiv, ku drejtuesit e shkollave parashtruan pyetje, komente dhe sugjerime konkrete, të cilave u përgjigjën drejtoresha Cacaj. Ata shprehën gatishmërinë e tyre që të gjitha kërkesat e paraqitura të shqyrtohen me kujdes dhe të merren parasysh në finalizimin e dokumentit buxhetor.
Numri i pjesëmarrësve ishte i kënaqshëm, çka tregon për interesimin dhe angazhimin serioz të të gjitha palëve për të avancuar cilësinë e arsimit në komunën tonë.
Komuna e Deçanit mbetet e përkushtuar që të vazhdojë organizimin e debateve publike dhe konsultimeve të rregullta me qytetarë, profesionistë dhe përfaqësues të institucioneve, me qëllim të ndërtimit të një qeverisjeje sa më gjithëpërfshirëse dhe transparente.
