Është mbajtur sot mbledhje komemorative, me rastin e ndarjes nga jeta të ish Deputetit të Parlamentit të Kosovës Jusuf Sutaj. Në këtë mbledhje komemorative ku te pranishëm ishin shumë miq e bashkëveprimtar te të ndjerit, me një fjalë u është drejtuar edhe Kryetari i Komunës së Deçanit z. Rasim Selmanaj.
Në fjalën e tije kryetari Selmanaj tha se :
Lajmi për vdekjen e Isuf Sutajt ,na ka goditur rëndë. Ai ishte njeri me virtyte të larta njerëzore dhe kombëtare. Isuf Sutaj ishte shembulli më i mirë i njeriut, intelektualit, veprimtarit e atdhetarit të devotshëm, i cili me përkushtim punoi për popullin dhe vendin e vet. Deçanasit Isufin e njohin që në kohën kur lëvizja ilegale kishte nisur të dilte edhe publikisht në aksione të ndryshme. Në kohën kur regjimi serb kishte ngulfatur jetën e shqiptarëve të robëruar Isufi ishte në rrethin e parë të veprimtarëve deçanas. Ishin vitet e 90-ta dhe në këtë kohë Isuf Sutaj, nuk fshihej nga pushteti serb. Veprimtarinë e kishte publike. Pikërisht në këtë kohë, kur dy lëvizjet vepronin për të njëjtin qëllim u njohëm dhe prej atëherë bashkëvepruam me shumë të tjerë po për të njëjtin qëllim. Dhe qëllimi i të gjithëve ishte Kosova shtet. E nderuara familje Sutaj
Të nderuar të pranishëm! Isuf Sutaj e ka hisen e pamohueshme në të gjitha zhvillimet dhe proceset që ndodhen deri në jetësimin aspiratës kombëtare, përkatësisht deri në krijimin e shtetit të dytë shqiptar, Kosovës. Populli ynë Isufin e kujton si profesor, deputet të Parlamentit të Kosovës, si veprimtar, por edhe si njeri që kishte përkrahur luftën e Ushtrisë Çlirimtare të Kosovës. Në kohën kur përplaseshin idetë se ishte ose jo koha për rezistencë të armatosur, ai publikisht ishte shprehur për bashkim në luftë për çlirimin e Kosovës. Isuf Sutaj njihet jo vetëm në opinionin deçanas si njeri që vazhdimisht kërkonte dhe punonte për unitetin e faktorit shqiptar. Ai kurrë nuk i donte ndasitë. Këtë e reflektoi publikisht para, gjatë dhe pas përfundimit të luftës së lavdishme të Ushtrisë Çlirimtare të Kosovës. Të nderuar të pranishëm! E nderuar familje Sutaj! Fjalët janë pak për Isuf Sutajn. Pas vetës la veprën, e cila përgjithmonë do të mbetet në kujtesën historike të këtij populli. Ne sot përulemi me respekt para veprës dhe dinjitetit të tij njerëzor. Ne sot thërrasim lavdi për veprën e tij, sepse lavdia do të jetë e përjetshme për Isuf Sutajn.
Në emër të LDK-së, një fjalë rasti për jetën dhe veprën e ish deputetit Sutaj, ka folur edhe Blerim Bajraktaraj, ndërsa të pranishmit e kësaj mbledhje komemorative i ka përshëndetur i biri i Jusuf Sutaj tashmë i ndjerë , Xhafer Sutaj, duke i falënderuar për respektin dhe për pjesëmarrjen në këtë mbledhje komemorative.
Ish deputeti Jusuf Sutaj, është varrosur më nderime në vendlindjen e tijë në Llukë të Epërme.
