USAID-i do të përkrah komunën në ngritjen e kapaciteteve të saja duke fokusuar në planifikimin zhvillimor gjithëpërfshirës dhe të asistencës teknike. Kështu është thënë në takimin me zyrtar komunal dhe të Iniciativës për Komuna Demokratike dhe Efektive (DEMI) e përkrahur nga USAID-i.
Derisa më herët në një takim të këtij niveli, përfaqësues të USAID-it kishin dhënë dritën e gjelbër për përkrahjen e kësaj komune, zyrtar të DEMI-it, bashkë me drejtor të drejtorive komunale dhe kryesuesin e Kuvendit Komunal, kanë debatuar rreth pyetësorit se ku gjendet Komuna aktualisht dhe cilat janë nevojat për përkrahjen e saj.
Halit Kadriu, zyrtar i projektit të DEMI-të, duke prezantuar pyetësorin siç tha ai si mjet matës për të kuptuar kapacitetet dhe sfidat e Komunës, ka thënë se “USAID-i do të përkrah komunën në ngritjen e kapaciteteve të saja, por paraprakisht bashkërisht duhet përpiluar planin e veprimit komunal. Sipas tij në këtë kuadër fokusi duhet përqendruar tek udhëheqja dhe menaxhmenti, administratën komunale, Kuvendin Komunal, ofrimin e shërbimeve, pjesëmarrjen e qytetarëve dhe të shoqërisë civile në vendimmarrje dhe zhvillimin ekonomik lokal.
Pas shqyrtimit të këtij pyetësori, në shumë pika Komuna ka marrë nota të mira, por megjithatë është vlerësuar se nevojat për ngritje të kapaciteteve, sikurse edhe për asistencë teknike janë të domosdoshme. “Pavarësisht se qëndrojmë bukur mirë në të gjitha sferat që u trajtuan këtu, kemi nevojë për përkrahje, ngase mendojmë të jemi shumë më funksional dhe efektivë në të gjitha fushat që shkojnë në shërbim të qytetarëve tanë”, ka thënë Jashar Dobraj, kryesues i Kuvendit Komunal. Ai pasi ka falënderuar USAID-in për përkrahjen e tij, është shprehur i sigurt se projekti i DEMI-së do të realizohet me sukses. Edhe zyrtarët tjerë komunal kanë vlerësuar se ngritja e kapaciteteve, hartimi i strategjive zhvillimore dhe asistenca teknike është e nevojshme dhe shkon në dobi të demokratizimit dhe efikasitetit në komunën e tyre.
